ခေတ်သစ်ကျွန်

တစ်နေ့က ကျနော့်ဆေးခန်းလေးကို ရင်ကျပ်ပန်းနာနဲ့ လာပြနေကျ လူနာတစ်ယောက် လာပါတယ်။ သူတို့လင်မယားက သမီးကမွေးတဲ့ မြေးမလေးနဲ့ သုံးယောက် သဲကွင်းခေါ်တဲ့ ရွှေပေါက်ကံအ၀င်ဝက ငမိုးရိပ်ချောင်းဘေးမှာ နေကြသူတွေပါ။ သူတို့က သဲလှေမော်တော်နဲ့ တစ်နေ့ကို နှစ်ခေါက် ချောင်းအတိုင်း မြစ်သုံးခွဆုံနားက ရန်ကုန်သောင်မှာ သဲသွားစုပ်တဲ့အလုပ်ကို နေ့စဉ်လုပ်ကြသူတွေပါ။ သူတို့ မိန်းမတွေကလည်း သဲထမ်းကျောက်ထမ်းအလုပ် ၀င်လုပ်ကြသူတွေပါ။ သူတို့သူဌေးပိုင်တဲ့ကွင်းထဲမှာပဲ တစ်ခြားအလုပ်သမားတွေနဲ့အတူ ဆယ်ပေပတ်လည်လောက် တဲလေးတွေ ထိုးပြီးနေကြပါတယ်။ သူရောဂါပြန်ဖြစ်တဲ့ညက သဲမော်တော်ဆိုက်ပြီး ကမ်းပေါ်စုပ်တင်ပြီး တဲပြန်အိပ်ကြတော့ပဲ ည ၁၂နာရီလောက် ရှိနေပါပြီ။ တစ်နာရီလောက်မှာ သူဌေးက ဘိလပ်မြေကားရောက်တယ်။ ညတွင်းချင်း အပြီးချရမယ်ဆိုပြီး လာနှိုးပါသတဲ့။ အဲဒီအလုပ်က တောင်ဒဂုံမှာပါ။ ဒါနဲ့ ထလိုက်သွားပြီး ဘိလပ်မြေအိတ် ၁၀၀၀ကို ထမ်းချလိုက်တာ လင်းခါနီးမှပဲ ပြီးပါတယ်။ မိုးလင်းတော့ ကျနော့်ဆီ ရောက်လာတဲ့အခါ သူ့လက်တွေက ပေါက်ပြဲပြီး ရောင်ကိုင်းနေတာပါပဲ။ ဒီထက်ဆိုးတာက သူ့ရင်ဘက်နှစ်ခုလုံးကနေ ရင်ကျပ်လို့ ထွက်နေတဲ့ ရွှီ ရွှီ အသံက နားကျပ်မတတ်ဘဲကို အတိုင်းသားကြားနေရတာပါ။ ကျနော်လည်း ကျနော့်မှာရှိတဲ့ ဆေး၊ ကျနော်တတ်သလောက် ပညာလေးနဲ့ ကြိုးစားပေးလိုက်တာ နာရီဝက်လောက်မှာပဲ သူနည်းနည်းတော့ သက်သာလာပြီး စကားကို လေသံတစ်ဆက်တည်း ပြောနိုင်လာပါတယ်။ သူကျနော့်ကို မေးတာ တစ်ခုတည်းပါ။ သူ့လက်တွေ အရောင်ကျဘယ်တော့ ကျမလဲတဲ့။ သူ ဒီည မော်တော်ပြန်လိုက်ရမှာမို့ပါ။ ကျနော်သူ့ကို နောက်တစ်ခေါက် ဘိလပ်မြေတွေသယ်ရင် နှာခေါင်းကို အ၀တ်နဲ့ လုံအောင်စည်းဖို့၊ မြစ်ပြင်ထဲ ညတွေဆို အရမ်းအေးတာမို့ ညဖက်တစ်ခေါက်ကို မလိုက်ဖို့ ပြောတာတွေ သူမကြားပါဘူး။ သူ့မိန်းမကို ကျနော် သေသေချာချာ ရှင်းပြပါတယ်။ ရင်ကျပ်ပန်းနာသမားက အမှုန်တွေ၊ အအေးဒဏ်တွေကို မခံသင့်တဲ့အကြောင်းတွေကိုပေါ့။ သူ့မိန်းမက ကျနော့်ကို ပြန်ပြောသွားတဲ့စကားက "သူ့ဝင်းထဲနေပြီး သူ့အလုပ် လုပ်နေရတာဆရာ၊ မတတ်နိုင်ဘူး" တဲ့။
ဘယ်သူက တတ်နိုင်ပါသလဲ။
သူ့ရောဂါနဲ့ ပတ်သက်ပြီး မှာတာတွေကိုတောင် သူတို့ လက်မခံနိုင်လောက်အောင် ခက်ခဲပင်ပန်းကြီးစွာ အသက်မွေးဝမ်းကြောင်းနေကြသူတွေကို အလုပ်ရှင်ဆိုတာ အလုပ်သမားကို အလုပ်ချိန်အတွင်းပဲ ပိုင်တယ်။ အလုပ်သမားတစ်ယောက်ရဲ့ အခြေခံအခွင့်အရေးတွေက ဘာတွေပါလို့ပြောဖို့ ကျနော်တော့ မတတ်နိုင်ပါ။ သူတို့ သာရေး နာရေးကအစ အရာအားလုံးကို တာဝန်ယူထားတဲ့ သူတို့အလုပ်ရှင် သူဌေးက သူတို့အတွက် နေစရာ အလုပ် အားလုံး ဖန်တီးပေးထားတဲ့သူ ဖြစ်နေတော့ နောက်တစ်ခါ သူရင်ကျပ်ပြန်တဲ့အခါ ကျနော့်မှာ သူလိုအပ်မယ့် ဆေးတွေ အဆင်သင့်ရှိနေအောင် စုဆောင်းထားဖို့ကလွဲလို့ ကျနော် ဘာမှ မတတ်နိုင်ပါ။ အမြဲတမ်း သူရင်ကျပ်လာတိုင်း ကျနော်က ကုပေးလိုက်ရင် ကောင်းသွားနေကျမို့ နောက်တစ်ခါ ကျနော်ကုပေးပြီးရင်လည်း ကျနော်က ကောင်းသွားမှာပါလို့ မပြောလည်း သူ ကျနော့်ကို ကောင်းသွားမယ်မလား ဆရာလို့ မေးတဲ့အခါ ရင်ကျပ်ပန်းနာရောဂါဟာ ဘယ်တော့မှ အရှင်းမပျောက်တဲ့အကြောင်း၊ သူ့နောက်ဆက်တွဲတွေအနေနဲ့ ဘာတွေဖြစ်တတ်တယ်ဆိုတဲ့အကြောင်းတွေ ပြောပြဖို့ ကျနော် တတ်နိုင်ပါ့မလား ကျနော့်ကိုယ်ကျနော် ပြန်မေးနေမိပါတယ်။

လူစိုး

ကျွန်တော်အားနာမိသူ

ရှင်ကွဲ ကွဲကြပေမယ့် ဇနီးဖြစ်သူအပေါ်မှာ နည်းနည်းမှ မငြိုငြင်ဘဲ သားနှစ်ယောက်ရဲ့ တာဝန်တွေကို ဇနီးသည်ကိုယ်စား ဝင်ထမ်းခဲ့တယ်။

ဆီးကျိတ်ကင်ဆာနဲ့ မရတော့ဘူးလို့ သိတဲ့အချိန်မှာလည်း ဇနီးနဲ့ တွေ့ခွင့်ရဖို့ အကြိမ်ကြိမ် ပယ်ချနေတဲ့ကြားက ဗီဇာရဖို့ စောင့်နေရင်း သူ့မွေးနေ့မှာပဲ ဆုံးသွားခဲ့တယ်။

သူ့သားငယ်ရဲ့ ပြောစကားကို သတိရစွာ ပြန်ရေးတင်လိုက်ပါတယ်။

"အဖေလုပ်ပေးခဲ့တာတွေဟာ သိပ်အသိအမှတ်ပြုမခံရပါဘူး။ အမေ့အတွက် နိုင်ငံတကာက ထောက်ခံအားပေးမှုတွေ ရလာအောင် လုပ်ပေးခဲ့တာ၊ အမေ နိုဗယ်ဆုရအောင် တိုက်တွန်းပြောဆိုပေးခဲ့တာ၊ အမေ့ကို သူလုပ်ချင်တာတွေ လုပ်ခွင့်ပေးခဲ့တာ၊ အမေ နောက်ဆံမတင်းရဘဲ ဆက်လုပ်နိုင်အောင် အားပေးခဲ့တာ၊ တစ်ချိန်တည်းမှာ သူ့အလုပ်တွေကို ဆက်လုပ်ရင်း ကျွန်တော်တို့ကို စောင့်ရှောက်ခဲ့တာ၊ .... ဒီလို အဖေ ပါဝင်ပေးခဲ့တဲ့ အခန်းကဏ္ဍကို လူတွေသိသင့်သလောက် မသိကြပါဘူး။" တဲ့။

သူဟာ ပညာကို တန်ဖိုးထားတဲ့၊ မိသားစုကို ချစ်တတ်တဲ့၊ မြန်မာပြည်ကို သံယောဇဉ်ရှိတဲ့ အနောက်တိုင်းသား လူကြီးလူကောင်းတစ်ယောက်ပါ။

လူလွန်မသားတွေက အမေ့ကို ကုလားမယားလို့ဆဲတိုင်း ကျွန်တော့်စိတ်ထဲမှာ သူပေးဆပ်ခဲ့တဲ့ ခင်ပွန်းတစ်ယောက်ရဲ့ စွန့်လွှတ်မှုနဲ့ ကျောင်းဆရာတစ်ယောက်ရဲ့ မြင့်မြတ်တဲ့စိတ်ထားကို ပြန်ပြန်မြင်ပြီး သူ့ကို အားနာနေမိပါတယ်။

လူစိုး
credit: ညနေခင်းသတင်း အတွဲ ၁၀ အမှတ် ၀၃

ဥပဒေသ(၇) ပုံစံခွက်မှ လွတ်မြောက်ခြင်း

အမှားတစ်ခုကို ထပ်ခါထပ်ခါ မကျူးလွန်မိစေနဲ့လို့ပြောရင် လူတကာ ပြောပြီးလို့ လူတကာ သိပြီးသားချည်းမှန်း ကျွန်တော် သိပါတယ်။ ဒါပေမယ့်လည်း တော်ပေ့ဆိုတဲ့သူတွေလည်း ဒီလိုအမှားမျိုးကို ထပ်ခါထပ်ခါ လုပ်မိတတ်ကြတယ်လေ။ ခင်ဗျားရဲ့ အရင်ရည်းစားဟာ “ဆောင်းအိပ်မက်ဆိုး”လို့ တွေးပြီး သူ့ကို သတိရစေမယ့် အရာတွေကနေ မိုင်ပေါင်းသန်းချီဝေးတဲ့အထိ ထွက်ပြေးချင်နေပေမယ့်လည်း ခင်ဗျား လက်ရှိချိတ်နေတဲ့တစ်ယောက်ကလည်း အရင်လူနဲ့ တစ်ပုံစံတည်းဖြစ်နေတတ်တယ်နော်။

လူနှစ်ယောက်ရဲ့ ဆက်ဆံရေးတိုင်းမှာ သီးသန့်ပုံသဏ္ဍာန်တစ်ခုစီ ရှိတယ်ဗျ။ တစ်ယောက်ယောက်က နာတာရှည်သံသယကြီးနေတာ၊ စိတ်မလုံခြုံတာ၊ တိရိစ္ဆာန်ချစ်တတ်တာ၊ အပြင်ဘဲခဏခဏ ထွက်ချင်နေတာ၊ အသက်အရမ်းကွာတာ၊ ဆရာလုပ်ချင်တာ၊ အလေးအနက်မထားတာ စသဖြင့်.... ပြသနာတစ်ခုမဟုတ် တစ်ခု ရှိတတ်ပါတယ်။ ခင်ဗျားက တိရိစ္ဆာန်မွှေးတွေနဲ့ ဓာတ်မတည့်တဲ့ ရောဂါမရှိရင် သူ့ဟာသူ ဘာကောင်မွေးမွေး အေးဆေးပါ။ ခင်ဗျားက လူကြားသူကြားသွားရမှာ သိပ်မကြောက်တတ်တဲ့ အမျိုးသမီးဆိုလည်း သူဘယ်သွားသွား ကိုယ်က အသာလေး လိုက်သွားရုံပေါ့။ ဒါပေမယ့် ဟုတ်နေလျက်နဲ့တော့ ဒီလူနဲ့ ဒီကိစ္စကြောင့် ရှေ့ဆက်ဖို့ အဆင်မပြေဖြစ်ခဲ့ပြီဆိုတာ သိသိလျက်နဲ့တော့ နောက်တစ်ယောက်ကလည်း ဒီပုံစံအတိုင်းပဲဆိုရင် အုတ်နံရံတစ်ခုတည်းကိုပဲ ခေါင်းနဲ့ ပြေးပြေးဆောင့်နေသလို ဖြစ်နေမှာပေါ့။

မလွယ်မှန်း ကျွန်တော်သိတယ်။ (ကျွန်တော် ဘယ်လိုမှ မကူညီနိုင်တဲ့ ကျွန်တော့်မိတ်ဆွေတစ်ယောက်ရဲ့ ဆက်ဆံရေးကို ကြည့်နေမြင်နေရတာနဲ့တင် မလွယ်မှန်း ကျွန်တော်တကယ်သိပါတယ်။) အကယ်၍ အနှီ စိတ်မလုံခြုံတတ်သော/ ကိုယ့်ကိုယ်ကို စွတ်ယုံတတ်သော/ စည်းမရှိအောင် လွတ်လပ်နေတတ်သော/ သစ္စာမရှိသော/ မကြင်နာတတ်သော/ ကာမပိုင်ရှိပြီးသော ပုဂ္ဂိုလ်မျိုးဟာ အခြားဘယ်ရှုထောင့်ကနေ စဉ်းစားစဉ်းစား ပစ်ရက်စရာမရှိအောင် ကောင်းနေခဲ့ပါရင်၊ သူနဲ့ကိုယ့်ကြား တည်ဆောက်ထားတဲ့ ဆက်ဆံရေးကို အဆုံးသတ်ပစ်ဖို့ အတော်လေးကို ခက်ပါတယ်။ ကဲ၊ ခင်ဗျား ကြိုက်သလို ဆုံးဖြတ်ပါ။ ကျွန်တော်ပြောလိုသမျှကတော့ ဒီလိုလူမျိုးဟာ ကိုယ်နဲ့ အရင်ကလည်း မအိုကေခဲ့ဘူးဆိုရင်၊ နောင်လည်း အိုကေစရာမရှိဘူးလို့ပဲ ပြောချင်တာ။ ဒါ့ကြောင့် ခင်ဗျား အပျက်အယွင်း မခံနိုင်တော့လို့ ဒီအတိုင်း နေချင်သပဆိုလည်း နေပါဗျာ။ နောင်မှ ဆိုးဆိုးရွားရွားတွေ ဖြစ်တဲ့အခါ ကျွန်တော်သတိမပေးရကောင်းလားလို့ မပြောပါနဲ့။ ကျွန်တော် တစ်ယောက်တည်းက ခင်ဗျားကို ပြောနေတယ်လို့တော့ မယူဆဘူး။ ခင်ဗျားအကြောင်းကို သိတဲ့ ခင်ဗျားမိတ်ဆွေတွေကလည်း ခင်ဗျားကို ပြောမှာပါပဲ။

ဒါပေါ့၊ အနည်ထိုင်နေတဲ့ အပြုအမူတွေကို ပြောင်းလဲရတာ သိပ်ခက်တာ။ အရေးကြီးဆုံးက ပြသနာကို အရင်သိဖို့၊ ပြီးတာနဲ့ ဒီဇာတ်ပျက်ထဲ ခင်ဗျား ဘယ်လောက်တောင် ထဲထဲဝင်ဝင်ဖြစ်နေပြီလဲဆိုတာ ခရေစေ့တွင်းကျ လိုက်တော့။ ခု ခင်ဗျားလုပ်စရာ တစ်ခုပဲ ကျန်တယ်။ မအောင်မြင်တဲ့ ဆက်ဆံရေးတွေမှာ ပုံချထားခဲ့တဲ့ ခင်ဗျားရဲ့ဘ၀ကို ခင်ဗျားကိုယ်တိုင် ပြန်ကောက်ဆယ်လိုက်ပါ။ မျက်နှာများတယ်ဆိုတာ လူကြားလို့လည်း မကောင်းသလို အဓိပ္ပါယ်လည်း သိပ်ရှိလှတဲ့ကိစ္စတော့လည်း မဟုတ်ဘူးလေ။ တစ်ခဏတော့ ပျော်စရာကောင်းသလို ထင်ရပေမယ့် ဘယ်လိုလူမျိုးမဆို လေးနက်ခိုင်မာတဲ့၊ အပြန်အလှန် နားလည်လေးစားတတ်တဲ့ မေတ္တာရေးမျိုးကို လိုချင်ကြတာပဲ။ နောက်တစ်ခေါက် ပြန်မစတင်ခင်အထိ ခင်ဗျားဘ၀ကို ခင်ဗျားပြန်ပိုင်နေသလို၊ နောက်တစ်ခေါက် ခင်ဗျားတွေ့မယ့်သူဟာ ခင်ဗျားကို ခေါင်းလေးတစ်ချက် ငြိမ့်ပြပြီးတာနဲ့ ခင်ဗျားဘ၀တစ်ခုလုံးကို ခလောက်ဆန်မယ့်သူ ဟုတ်ချင်မှ ဟုတ်တော့မှာပေါ့။ 

ခင်ဗျားလိုချင်တဲ့ ဆက်ဆံရေးမျိုးဟာ တကယ်လည်း အလုပ်ဖြစ်ပြီး၊ ခင်ဗျားတို့ နှစ်ယောက်လုံးလည်း စိတ်ချမ်းသာရတဲ့၊ ပျော်စရာကောင်းတဲ့ ရေရှည်ဆက်ဆံရေးမျိုးဆိုရင်၊ ခင်ဗျားအနေနဲ့ ပုံစံခွက်ကိုရိုက်ခွဲပစ်လိုက်ဖို့ကလွဲရင် တခြားနည်း မရှိပါဘူး။ တကယ်ချစ်ရင် ပြောင်းလဲပေးတတ်တယ်လို့ ခင်ဗျား ယုံတယ်မလား။ သူပြောင်းလဲလာမယ့် အချိန်ကို ထိုင်စောင့်ရတာ အကျဉ်းကျနေတဲ့ သူတစ်ယောက် လွတ်ရက်မျှော်ရတာနဲ့ တူနေလိမ့်မယ်။ ပွင့်ပွင့်လင်းလင်းသာ ပြောပြပါ။ မှားနေတာ ဘာ၊ ပြင်ရမှာ ဘာ၊ နင်က ဘာတွေပြင်၊ ငါလည်း ဘာတွေပြင်မယ်၊ အချိန်ဘယ်လောက်ယူမယ်၊ နောက် ဒါမျိုး ထပ်မဖြစ်ရအောင် နှစ်ယောက် ဘယ်လိုကတိတွေ ပေးမယ် စသဖြင့် ကိုယ့်ဘာသာကိုယ်ပဲ ညှိကြပါ။ 

ကျွန်တော် ပြောခဲ့တယ်လေ၊ ဆက်ဆံရေးတိုင်းမှာ သီးသန့်ပုံသဏ္ဍာန်တစ်ခုစီ ရှိပါတယ်လို့။ ဒါပါပဲ။ ကျွန်တော်လည်း သွားညှိလိုက်ဦးမယ်။

လူစိုး

The Rules of Love - Richard Templar ကို မှီငြမ်းပါတယ်။

ဥပဒေသ(၆) အရေပြားတစ်ထောက် ပြသနာ

ခင်ဗျား ခုလောလောဆယ် တစ်ယောက်တည်း ဖြစ်နေရင်၊ ခင်ဗျားကိုခင်ဗျား ရုပ်မရှိလို့ဆိုပြီး အပြစ်တင်ချင်လည်း တင်မိလိမ့်မယ်။ ခင်ဗျားဟာ အ၀လွန်ချင် လွန်နေမယ်၊ နဖူးက ပြောင်စပြုလာမယ်၊ ဗိုက်က နည်းနည်းစူထွက်လာမယ်၊ မျက်ရစ်တွေ ထင်းလာမယ်၊ သိပ်ကိုသေးသေးကွေးကွေးဖြစ်နေမယ်၊ အရပ်က အရမ်းကြီးရှည်နေမယ်၊ ဒါမှမဟုတ် သွားလေးနည်းနည်း ခေါနေမယ်ဆိုပါတော့..

ခင်ဗျား ဘေးပတ်ဝန်းကျင်ကို လေ့လာကြည့်ပါ။ တကမ္ဘာလုံးက လူတွေက ခင်ဗျားထက် ပိုဝ၊ ပိုပြော၊ အရေးအကြောင်းတွေပိုများ၊ ပိုရှည်၊ ပိုပု၊ ဒါမှမဟုတ် သွားဆရာဝန်ဆီကို ခင်ဗျားအရင် သွားဖို့လိုအပ်နေတဲ့သူတွေက ပိုများမနေဘူးလား။ ဒါပေမယ့် သူတို့ကတော့ သူတို့ချစ်တဲ့သူတွေနဲ့ အတူတူ တည်ဆောက်ထားတဲ့ မေတ္တာရေးမှာ ပျော်ပျော်ကြီး အခြေကျနေကြတယ်။ သူတို့ဟာ အစတုန်းကတော့ ကြည့်ပျော်ရှုပျော် ရှိခဲ့မှာပါလို့ မထင်လိုက်ပါနဲ့။

အရေပြားတစ်ထောက်ပါလို့ အော်နေပြီး အဲဒီအရေပြားတစ်ထောက်အောက်ကို ဖောက်မကြည့်နိုင်တဲ့ အမျိုးသား၊ အမျိုးသမီးတွေ အများကြီးပါ။ အထူးသဖြင့် အခုလို ရုပ်ကို သိပ်ဦးစားပေးတဲ့ခေတ်မှာ ပိုဆိုးတယ်လေ။ ဒါ ခင်ဗျားကိစ္စမဟုတ်ဘူးလို့ တွေးလိုက်ပါ။ ကိုယ့်ရုပ်ရည်ကို သဘောကျလို့ ချဉ်းကပ်လာသူတွေက တစ်ချိန်ကျ ကိုယ့်အိုသွားတဲ့အခါ၊ ၀ိတ်တွေတိုးလာတဲ့အခါ ခင်ဗျားကို ထားခဲ့မယ့်သူတွေပဲ။ ခုတော့ ဒါကို ခင်ဗျားပူနေစရာမလိုဘူး။ ခင်ဗျားမှာ စွဲဆောင်မှုမရှိလေတော့ သူတို့က ခင်ဗျားကို အာရုံမကျတော့ဘူးပေါ့။

တစ်ဖက်မှာ၊ ကိုယ်နဲ့ထိုက်တန်တဲ့သူ တစ်ယောက်ကတော့ ကိုယ့်မှာ ရုပ်ပိုင်းဆိုင်ရာအားနည်းချက်တွေ ရှိနေရင်တောင်မှ ကိုယ့်ကို တကယ်ချစ်နေမယ်ဆိုရင် လုံလောက်တယ်မလား။ (အားနည်းချက်လို့လည်း တွေးချင်မှ တွေးမှာပါ။)
ခင်ဗျားအတွက် အရာရာအကောင်းဆုံးဖြစ်စေတဲ့သူတစ်ယောက်ကို ၀လာလို့၊ မျက်မှန်ကြီးနဲ့မို့လို့၊ နှာခေါင်းကြီးက ပွလွန်းလို့ဆိုပြီး ခင်ဗျားထားခဲ့မလား။ မထင်ပါဘူး။ သူဆိုရင်လည်း ဒီလို လုပ်မှာမဟုတ်ဘူးလေ။

တကယ်တော့၊ ဒါဟာ ရုပ် ကိစ္စသက်သက် မဟုတ်ဘူး။ ပိုင်ဆိုင်မှုတွေ၊ လက်ရှိအနေအထားတွေ - ဆင်းရဲတာ၊ ကားမစီးနိုင်တာ၊ အိမ်ငှားနေရတာ အားလုံးအတူတူပဲ။

ခင်ဗျား သွားကို ခင်ဗျားပြန်ပြန်ကြည့်ပြီး သဘောမကျဖြစ်နေရင် သွားပြင်လိုက်ပါ။ ၀ိတ်တက်လာတယ်ထင်ရင် အစားကိုထိန်းလိုက်ပေါ့။ ဆံပင်ဆိုတာလည်း ပြန်စိုက်လို့ရနေပြီပဲ။ ကျွန်တော်ပြောချင်တာ ခင်ဗျား ပျော်မယ်ဆိုရင် ပြောင်းလဲပစ်လိုက်လို့ ရတယ်၊ ဒါပေမယ့် ဘ၀လက်တွဲဖော်လေးများ ရမလားဆိုပြီးတော့တော့ မပြောင်းလဲပစ်ပါနဲ့။ ခင်ဗျားနဲ့ အထိုက်တန်တဲ့သူက အပြင်မှာ ရှိနေမှာပါ။ သူတို့က ခင်ဗျားကို ရှာတွေ့မှာပါ။

ဒါ့ကြောင့် ကိုယ့်ကိုယ်ကို ယုံကြည်လိုက်စမ်းပါ။ ခင်ဗျားရဲ့ စိတ်ရောကိုယ်ပါ တန်ဖိုးထားတတ်တဲ့သူတစ်ယောက်အတွက် ခင်ဗျားဟာ စွဲဆောင်မှုရှိနေပါသေးတယ်။ အဲ့ဒီလူနဲ့ ခင်ဗျားတွေ့တဲ့အခါ ခင်ဗျားစိတ်မှာ ခင်ဗျားတို့နှစ်ယောက်ဟာ ထူးခြားပြီး လှနေတယ်လို့ ခံစားရပြီး ခင်ဗျားရဲ့ ရုပ်ပိုင်းဆိုင်ရာ အားနည်းချက်တွေကိုလည်း မေ့သွားပါလိမ့်မယ်။

လူစိုး
The Rules of Love - Richard Templar ကို မှီးပါသည်။

ဥပဒေသ(၅) ရယ်အောင်လုပ်နိုင်သူ

သိပ်သဘောကျတဲ့အချက်ဖြစ်နေတာကော၊ ဆက်ဆံရေးတစ်ခုမှာ လုံးဝအရေးကြီးဆုံးလို့ ယူဆနေတာကြောင့်ပါ ဒီဥပဒေသကို ရှေ့ဆုံးမှာထားမိမတတ်ဖြစ်ရပါသေးတယ်။
ခင်ဗျား လူတစ်ယောက်ကို သူ့အသွင်အပြင်၊ အနေအထား၊ ကိုယ်ရည်ကိုယ်သွေးကို သဘောကျလို့ ရွေးလိုက်တယ်ဆိုရင် တဖြည်းဖြည်းနဲ့ ခင်ဗျား နောင်တရလာလိမ့်မယ်။
အဲဒါတွေအားလုံးဟာ ဘ၀လမ်းတစ်လျှောက်မှာ ပြုတ်ကျဆုံးရှုံးသွားရနိုင်တဲ့အရာတွေဖြစ်နေလို့ပဲ။
အကျင့်စရိုက်တွေကအစ ပြောင်းလဲသွားနိုင်တယ်။ ကိုယ့်ကိုယ်ကိုယ် ယုံကြည်မှုရှိတဲ့သူတစ်ယောက်ဟာ စိတ်ထိခိုက်ကြေကွဲစရာ အဖြစ်အပျက်တစ်ခုကြောင့် စိတ်ဓာတ်တွေ ကွဲကြေသွားနိုင်သလို စိတ်ရှည်သည်းခံတတ်တဲ့သူတစ်ယောက်ကလည်း ဝေဒနာတစ်ခုခုကို ပြင်းပြင်းထန်ထန်ခံစားရတဲ့အခါ စိတ်ဆတ်တဲ့သူ၊ ဒေါသထွက်လွယ်တဲ့သူ ဖြစ်သွားနိုင်တယ်လေ။

ဒါပေမယ့် “ဇ၀နညဏ်”ကလေးကတော့ဖြင့် အခြားအရာတွေ အားလုံးဆုံးရှုံးလိုက်ရရင်တောင် ခင်ဗျားနဲ့အတူ ရှိနေဦးမယ်။ အလုပ်ကနေ အနားယူလိုက်တာ နှစ်ကိုဆယ်နဲ့ချီကြာခဲ့ပြီ၊ ကလေးတွေလည်း အရွယ်ရောက်လို့ သူ့ဟာနဲ့သူ အခြေကြကုန်ကြပြီ၊ ခင်ဗျားတို့နှစ်ယောက်ကတော့ အိမ်ရှေ့က ခြံဝင်းလေးထဲ သစ်ပင်ရိပ်ကလေးအောက်မှာ ကုလားထိုင်လေးကိုယ်စီနဲ့ အေးအေးသက်သာ အနားယူနေတဲ့အချိန်ရောက်တဲ့အခါ ခင်ဗျားမှာ ဟာသမြောက်အောင် ပြောတတ်တဲ့စရိုက်လေးပဲ ကျန်ချင်ကျန်တော့မှာ။ အဲလိုဆိုရင်တောင်မှ ခင်ဗျားတို့နှစ်ယောက်အတွက် လုံလောက်တယ်မလား။

ဟာသညဏ်ဆိုတာ သိပ်ကို ပုဂ္ဂလိကဆန်တဲ့အရည်အသွေးတစ်ခုပါ။ လူတစ်ချို့ဟာ ကျွန်တော်တို့ကို ရယ်မောအောင် လုပ်နိုင်တဲ့နေရာမှာ အများစုထက်သာတာကို ခင်ဗျားသတိထားမိလား။ လူတစ်ယောက်အနေနဲ့ နေ့စဉ်အလုပ်တွေ၊ ဖိအားတွေ၊ သောကတွေ၊ ချုပ်တည်းမှုတွေရှိနေတာကြောင့် တစ်နေ့မှာ လွတ်လွတ်လပ်လပ် အားရပါးရ ရယ်လိုက်ရတဲ့အချိန် ဘယ်နှစ်မိနစ်ရှိပါသလဲ။ အဲဒီမိနစ်ပိုင်း၊ အချိန်ပိုင်းလေးတွေကို ကိုယ့်ကိုရယ်အောင်လုပ်နိုင်မယ့်သူတစ်ယောက်ကို သင်တွေ့တဲ့အခါ သင့်သိစိတ်က သတိမထားမိပေမယ့် သင့်မသိစိတ်က အဲဒီလူနဲ့ စကားပြောချင်နေတယ်၊ အဲဒီလူပြောတဲ့ ဟာသတစ်ခုခုကို ကြားချင်နေတယ်။ ဒါကို အချစ် လို့ ကျွန်တော် မဟုတ်တမ်းတရား မစွပ်စွဲလိုဘူး။ ဒါပေမယ့် ခင်ဗျားအနေနဲ့ သူ့အနားမှာ နေနေရတာကို ပျော်နေတတ်ပြီဆိုရင်တော့ ခင်ဗျား သူ့ကို ချစ်နေမိပြီပေါ့။
(ဒီနေရာမှာ စိတ်ရဲ့ သာယာမှာ ပျော်တတ်တဲ့ သဘောသဘာဝကို နားလည်ပါ။) ကျွန်တော်ပြောချင်တာက စိတ်ဖိစီးစရာတွေနဲ့ မပျော်မရွှင်ဖြစ်နေတဲ့ ခင်ဗျားကို ပျော်အောင်လုပ်ပေးနိုင်တဲ့သူတစ်ယောက်က သူ့ရဲ့ ရယ်စရာကောင်းတဲ့ဟာသတွေနဲ့ ခင်ဗျားကို ချဉ်းကပ်လာတဲ့အခါ သူနဲ့ခင်ဗျားကြားမှာ ခင်ဗျားကိုယ်တိုင် လိုလိုလားလားနဲ့ ကြိုးတစ်ချောင်း ချည်နှောင်လိုက်မိသွားနိုင်ပါတယ်။
စဉ်းစားစရာ နောက်ထပ်တစ်ခု ပေးမယ်ဗျာ။ ကိုယ့်ကို ရယ်အောင်လုပ်နိုင်တဲ့သူက ကိုယ့်အတွက် အရေးကြီးတယ်ဆိုပေမယ့်လို့ အကောင်းဆုံးကတော့ ကိုယ့်ကိုယ်ကို ပြန်ရယ်အောင် လုပ်နိုင်တဲ့သူကို ရှာဖွေဖို့ပါ။ (ကိုယ့်ဒုက္ခ၊ ကိုယ့်ပြသနာတွေကို သူ့ကို ကိုယ်ကပြန်ပြောပြတဲ့အခါ ကိုယ့်ပြောပုံက သူ့အတွက် ရယ်စရာမောစရာဖြစ်နိုင်မလား။ သူ့ကြောင့် ကိုယ်စိတ်မညစ်ရသလို၊ ကိုယ့်ကြောင့်လည်း သူစိတ်မညစ်စေချင်ဘူးဆိုတဲ့စိတ်ကလေး ရှိနိုင်မလား။) လုပ်မကြည့်ရသေးတဲ့အချိန်မှာတော့ ခက်ခဲလိုက်တာလို့ ထင်ချင်စရာပါပဲ။

ကျွန်တော့် အကိုတစ်ယောက်ရှိတယ်။ ကြည့်လိုက်ရင် သူ ဘ၀ကိုဖြတ်သန်းနေပုံဟာ သိပ်ကို ပေ့ါပါးလွန်းတယ်လို့ ထင်ချင်စရာရှိပေမယ့် သူ့ကိုတွေ့လိုက်ရင် အမြဲ ဟာသနဲ့ပါ။ သူဟာ သူ့အနီးအနားက သူသံယောဇဉ်ရှိတဲ့သူတွေကို ပျော်အောင်ထားနိုင်တယ်။ သူ့အမျိုးသမီးဟာ သူ့ထက် အသက်ငယ်ပေမယ့် သူတို့နှစ်ယောက်ကြားက ဆက်ဆံရေးမှာ ပျော်စရာကောင်းတဲ့ စကားတွေ၊ စိတ်ကြည်နူးစရာ ဘ၀အတွေ့အကြုံတွေနဲ့ တည်ဆောက်ထားတာမို့ သားလေးတစ်ယောက်နဲ့အတူ အေးအေးချမ်းချမ်း ဖြတ်သန်းနေတာကို မြင်နေရတယ်လေ။ နောက်ထပ် သက္ကရာဇ်တွေ ကုန်ဆုံးသွားပြီးတဲ့အခါမှာလည်း ကျွန်တော့်မရီးဟာ ကျွန်တော့်အကိုနားမှာ ပျော်နေဦးမှာပါပဲ။

ဒါ့ကြောင့် နောက်တစ်ခေါက် သင် သွားရင်လာရင်း သမင်မျက်လုံးတို့၊ သန္တာရောင်နှုတ်ခမ်းတို့ ဒါမှမဟုတ် စွဲမက်စရာအကြည့်တို့၊ အားကိုးလောက်စရာ ရဲရင့်တဲ့ဟန်ပန်တို့ကို တွေ့တဲ့အခါ ချက်ချင်းကြီး ကြွေကျမသွားနဲ့ဦးနော်။ သူတို့က ခင်ဗျားကို မတို့မထိဘဲ ရယ်အောင်လုပ်နိုင်လားဆိုတာ အရင်ကြည့်လိုက်ပါဦးလေ။

လူစိုး
The Rules of Love - Richard Templar ကို မှီငြမ်းသည်။

ဥပဒေသ(၄) နဖူးစာက သူ့အလုပ်သူလုပ်တယ်

ရိုးရိုးသားသား ၀န်ခံရရင် ဒါ တကယ်ကော အလုပ်ဖြစ်ပါ့မလားလို့ ကျွန်တော် တစ်ခါတစ်လေ သံသယဖြစ်မိတယ်။ လူတစ်ချို့ကတော့ မြင်လိုက်တဲ့ခဏမှာပဲ ဒီလူဟာ သူတစ်သက်လုံး ရှာနေတဲ့ သူ့ဘ၀ရဲ့ လက်တွဲဖော်ပဲဆိုတာ တန်းသိကြတယ်တဲ့။ ဒါပေမယ့် လူတိုင်း ဒါမျိုးမဖြစ်နိုင်ဘူးလေ။

အဓိကအချက်က ခင်ဗျားအနေနဲ့ သူဟာ မှန်ကန်တဲ့တစ်ယောက်လို့ မသေချာရင်၊ ဘ၀ကို ပုံအောပြီး လောင်းကစားလုပ်မပစ်လိုက်နဲ့ပေါ့။ ဘာ့လို့ဆိုတော့ သူကသာ The right ONE ဆိုတာ သေချာရင် အချိန်နည်းနည်းယူရမယ်ဆိုရင်တောင် ခင်ဗျား သိလာမှာမို့ပါ။ တစ်နည်းပြောရရင်၊ ချက်ချင်းပဲဖြစ်ဖြစ် အချိန်ယူပြီးတော့မှဖြစ်ဖြစ် ခင်ဗျားအတွက် မှန်တယ်၊ မမှန်ဘူးဆိုတာ သိလာမှာပါပဲ။

ဘ၀ကို ပုံအောပေးလိုက်တယ်ဆိုတဲ့ကိစ္စမှာ လူတစ်ချို့က တစ်မျိုးတွေးနိုင်ပေမယ့် အရေးကြီးတာက ယောက်ျားပဲဖြစ်ဖြစ်၊ မိန်းမပဲဖြစ်ဖြစ် ခင်ဗျားမသေချာမချင်း ပုံအပ်မပစ်လိုက်ဖို့ပဲ။ ဒါကို “commitment” လို့ ခေါ်ပါတယ်။ သေချာပြီဆိုရင်လည်း လူနှစ်ယောက်စိတ်တူကိုယ်တူ တည်ဆောက်ထားတဲ့ ဆက်ဆံရေးမှာ တစ်ယောက်ယောက်က လိုအပ်သလောက် ပုံအပ်မှုမရှိဘူးဆိုရင် ပြသနာရှိနိုင်တယ်ဆိုတာ မမေ့ပါနဲ့။ အချစ်ဆိုတာ အပေးအယူမဟုတ်ဘူး ဆိုရင်တောင် အသွားအပြန်သဘော ရှိနေပြန်တယ်လေ။ အိမ်ထောင်ရေးအဆင်မပြေတဲ့သူ ဘယ်နှစ်ယောက်ဆီက “သိလား၊ မင်္ဂလာဆောင်နေ့ကတည်းက ငါလုပ်နေတာ ဟုတ်ရောဟုတ်ရဲ့လားမသိဘူးလို့ တွေးနေမိတာ” လို့ ပြောတာမျိုး ကြားဖူးရသလဲ။

ကဲ၊ ကျွန်တော် ပြောနိုင်ပါ့ဗျား။ မင်္ဂလာဆောင်တဲ့နေ့အထိ ငါလုပ်တာ ဟုတ်ရောဟုတ်ရဲ့လားလို့များ ခင်ဗျားတွေးနေမိရင်၊ ခင်ဗျားလုပ်နေတာ မဟုတ်ပါဘူး။ ခင်ဗျားလုပ်နေတာ အမှားအကြီးကြီးပါ။
လက်ထပ်ခြင်း +/- ကလေးတွေဆိုတာ ခင်ဗျားအနေနဲ့ သင့်တော်တဲ့လူလို့ တကယ်မသေချာတဲ့ လူတစ်ယောက်နဲ့ တည်ဆောက်ဖို့ဆိုတာ သိပ်ကိုခက်ခဲပါလိမ့်မယ်။ မသေချာဘဲ ဇွတ်ဝင်တိုးရင် ခင်ဗျား ရူးနေလို့ပါပဲ။

အစမှာ ခင်ဗျားအနေနဲ့ ဟုတ်ပါ့မလားလို့ မသေမချာဖြစ်တာဟာ ပုံမှန်ပါ။ ဒီအချိန်ဟာ နဂိုက သံသယကြီးတတ်သူတစ်ယောက်အတွက် လနဲ့ နှစ်နဲ့ချီပြီး ကြာချင်လည်း ကြာသွားနိုင်တယ်။ စိတ်ကို အေးအေးထားပါ။ ခင်ဗျားမသေချာမချင်း၊ တစ်သက်လုံးအတွက် ပုံအပ်မပစ်လိုက်နဲ့ဦး။

ခင်ဗျား လက်တွဲဖော်က ခင်ဗျားအရင်တောင် ပိုသေချာချင် သေချာနေဦးမှာ။ ဒါပေမယ့် ခင်ဗျား အဆင်သင့်မဖြစ်သေးခင်မှာ မြန်မြန်ဆုံးဖြတ်ချက်ချဖြစ်အောင် ဖိအားပေးတာမျိုး အဖြစ်မခံပါနဲ့။ ကိုယ့်စိတ်နဲ့၊ ကိုယ့်အသိအညဏ်ကို လေးစားတတ်ဖို့ နားလည်အောင် ပြောပြပါ။ တစ်ယောက်ဆုံးဖြတ်ချက် အမှားလုပ်မိရင် နှစ်ယောက်လုံး နစ်နာမယ်ဆိုတာ သူသိသင့်ပါတယ်။

တကယ်လို့ သူဟာ ခင်ဗျားနဲ့အတူ ဘ၀ကို အတူတူဖြတ်သန်းမယ့်သူဆိုတာ သေချာသွားရင်၊ “ငါမသိဘူးလေ၊ ဖြစ်မှ ဖြစ်ပါ့မလား”လို့ ခင်ဗျားမပြောတော့ဘူး။ ဖြစ်သွားမှာပါ။ နဖူးစာကို ယုံကြည်လိုက်စမ်းပါလေ။

လူစိုး

The Rules of Love - Richard Templar ကို မှီးပါတယ်။

ဥပဒေသ(၃) စိတ်ချမ်းသာဖို့ လိုရင်းဖြစ်တယ်

        အမြဲတမ်း တစ်ယောက်မဟုတ် တစ်ယောက်နဲ့ တွဲနေတတ်တဲ့မိန်းမတစ်ယောက်ကို ကျွန်တော် တွေ့ဖူးတယ်။ ဒါမျိုးကတော့ ခင်ဗျားလည်း သိတဲ့အတိုင်း ၀မ်းဂိုး.. တူးကမ်းပုံစံပေါ့။ တစ်ခါတော့ မနေနိုင်လို့ ကျွန်တော် မေးကြည့်မိတယ်။ ဘာလို့ ဒီလိုတွေ လုပ်နေသလဲပေါ့။ “သူ တစ်ယောက်တည်း မနေတတ်လို့ပါ”တဲ့။ မနေတတ်လို့ မနေရအောင် လုပ်ထားရတယ်ပေါ့။ ကျွန်တော့်စကားနဲ့ပြောရရင် “ဒို့များက ချစ်ကံခေသကိုး”ပေ့ါဗျာ။
        နောက်ထပ် ဥပမာတစ်ခု ထပ်ပေးပါဦးမယ်။ ဒါမျိုးကိုတော့ သူတို့ဆီမှာ emotionally-dependent ဖြစ်တယ်လို့ ခေါ်ကြပါတယ်။ “နင် ကောင်းကောင်းနေပါ။ ငါက စိတ်ပူပန်တတ်တယ်။ နင် တစ်ခုခုဆို ငါစိတ်ပူရလို့ သေတော့မယ်။” ဆိုတဲ့စကားမျိုးကို ပြောတတ်တဲ့ ယောက်ျားမိန်းမ သူသူငါငါဟာ စိတ်ခံစားချက်အရ တစ်ပါးသူအပေါ်မှာ မှီခိုနေသူတွေပါပဲ။ တစ်နည်းအားဖြင့် “ငါ စိတ်ချမ်းသာဖို့ မင်းမှာ တာဝန်ရှိတယ်”ဆိုတဲ့ အဓိပ္ပါယ်ပဲလေ။
       ရိုးရိုးလေးပဲ စဉ်းစားကြည့်စမ်းပါ။ ကိုယ်စိတ်ချမ်းသာဖို့ ဘယ်သူ့မှာ တာဝန်အရှိဆုံးလဲ။ ကိုယ်ကိုယ်တိုင်ပဲ မဟုတ်ဘူးလားဗျာ။ လူတစ်ယောက်ကို ချစ်မိတဲ့အတွက် သူ့ကြောင့် ပျော်ရွှင်တာတွေ၊ ၀မ်းနည်းတာတွေ ရှိနိုင်ပေမယ့် စိတ်ချမ်းသာတယ်ဆိုတဲ့ကိစ္စဟာ သာမန်ရီဟယ်၊ ငိုဟယ်ကိစ္စထက် အများကြီး ပိုပြီးလေးနက် ရှုပ်ထွေးပါတယ်။
       ဖုန်းဆက်ရမယ့်အချိန်မှာ မဆက်တဲ့ ခင်ဗျားချစ်သူကို ခင်ဗျားအနေနဲ့ စိတ်ဆိုးချင် ဆိုးခွင့်ရှိတယ်။ ညဘက် အိမ်ပြန်ရောက်ရမယ့်အချိန်မှာ မရောက်သေးတဲ့ ခင်ဗျားချစ်သူကို ခင်ဗျားအနေနဲ့ စိတ်ကောက်ချင် ကောက်ခွင့်ရှိတယ်။ ဒါပေမယ့် “င့ါကို စိတ်ချမ်းသာအောင် ထားပါ”လို့တော့ ခင်ဗျား တောင်းဆိုခွင့်မရှိဘူး။
       ခင်ဗျားစိတ်မချမ်းမသာဖြစ်နေတဲ့အချိန်မှာ ခင်ဗျားချစ်သူက ခင်ဗျားဘေးမှာ ခင်ဗျားပျော်အောင် ဘာတွေပဲ လာလုပ်ပြနေပါစေ၊ ခင်ဗျား ခဏလောက် ပြုံးဖြစ်ချင် ပြုံးဖြစ်မယ်.. တကယ် စိတ်မချမ်းသာနိုင်ပါဘူး။ ရှင်းပါတယ်နော်၊ ခင်ဗျားစိတ်ချမ်းသာဖို့ တာဝန်အရှိဆုံးလူဟာ ခင်ဗျားကိုယ်တိုင်ပဲ။
      ပထမဥပမာက အမျိုးသမီးဟာ စိတ်မချမ်းမသာဖြစ်နေရတဲ့အပေါ်မှာ ရောဂါကို ပျောက်အောင်မကုဘဲ
ဝေဒနာသက်သာအောင်သာ လုပ်နေသလို ဖြစ်နေတာပါ။ သူတစ်ယောက်တည်း နေရတာဟာ မလုံခြုံဘူးလို့ ခံစားရတဲ့အတွက် သူ့အနားမှာ အမြဲလို အဖော်တစ်ယောက်ရှိနေအောင် လုပ်နေတာပဲလေ။
     ဒီဥပဒေသရဲ့ အဓိကအချက်က တစ်ယောက်တည်းပဲဖြစ်ဖြစ်၊ နှစ်ယောက်ပဲဖြစ်ဖြစ် စိတ်ချမ်းသာအောင် နေတတ်ဖို့က အဓိကပဲဆိုတာ ပြောလိုခြင်းဖြစ်ပါတယ်။ တစ်ယောက်တည်း မနေရဲလို့၊ မနေတတ်တော့လို့ စိတ်ဆင်းရဲခံပြီး တခြားလူတစ်ယောက်ရဲ့ အဖော်လုပ်ပေးနေစရာ မလိုဘူးလေ။ ခင်ဗျား စိတ်မှာ ချမ်းသာနေတဲ့အခါ တစ်ယောက်တည်း နေရရင်လည်း ပျော်တယ်။ ခင်ဗျား ချစ်တဲ့သူနဲ့ နေရတဲ့အခါ ပိုပျော်တယ်။ ဒါပဲလေ။

လူစိုး
The Rule of Love - Richard Templar ကို မှီးပါတယ်။