Monday, March 11, 2013

လူသတ်ပွဲများ

"အင်း အဲဒါပါပဲ စန္ဒသူရိယ၊ ကျွန်ုပ်စဉ်းစားနေတာ။ ကျွန်ုပ်တို့ တိုတောင်းလှတဲ့ လူ့သက်တမ်းအတွင်းမှာ ဒီလို အကျည်းတန်လှတဲ့ စစ်ပွဲတွေနဲ့ လူတစ်ဦးနဲ့တစ်ဦး သတ်ဖြတ်ပြီး ဘာ့ကြောင့် အချိန်ကုန်ခံနေရတာလဲလို့ တွေးမိတာပါ။"

တရံရောအခါ ဂင်္ဂါ
စာရေးဆရာ Cho Tu Zal

သမိုင်းကို သင်ခန်းစာ ယူတတ်ဖို့ လိုပါပြီ။
အာသံ၊ မဏိပူရ၊ အယုဒ္ဓယနဲ့ အင်ဒိုချိုင်းနားကျွန်းဆွယ်ကို သိမ်းပိုက်နိုင်ခဲ့ဖူးတယ်။ နောက်ဆုံးတစ်နေ့ကျတော့ အားလုံးကို ပြန်ပြီးဆုံးရှုံးခဲ့ရတာပဲ မဟုတ်လား။
ဖက်ဆစ်ဂျပန်က လူတွေကို ညှင်းပန်းနှိပ်စက်ခဲ့တာ မှန်ပေမယ့် အင်္ဂလိပ်လက်အောက် (၁၈၈၅-၁၉၄၈) ၆၃နှစ်နေခဲ့ရတာရဲ့ အကျိုးရလဒ်က တိုင်းရင်းသားတွေနဲ့ ပြည်မကြားမှာ မမြင်ရတဲ့စည်းတစ်ခုက အလိုလို ခြားထားပြီးသား ဖြစ်သွားပါတယ်။
သူတို့တွေအတွက် အာမခံချက်ဘာမှမပေးနိုင်ဘဲ ပြည်ထောင်စုနာမည်သုံးပြီး အတူတူအငတ်ခံခိုင်းထားသလို ဖြစ်မနေဘူးလား။
သူတို့ရဲ့ မူလပိုင်ဆိုင်တဲ့ သယံဇာတတွေကို ထုတ်ယူသုံးစွဲဖို့သက်သက် လုပ်လိုက်သလို ဖြစ်မသွားဘူးလား။
ဖက်ဒရယ်ပြည်ထောင်စုစစ်စစ်မှာ သူတို့တွေ သွေးထိုးနေသလို ပတ်စ်ပို့မလိုသလို ဘယ်ပြည်နယ်ကမှလည်း ဓနသဟာယထဲ ပြောင်းမသွားနိုင်ပါဘူး။
အယုဒ္ဓယကို အတင်းမရမက ဝင်သိမ်းပြီး သူတို့ဘုရင်ကို သယ်လာခဲ့တဲ့အကြောင်းဆို မစားရ ဝမခန်းပြောတတ်ကြပေမယ့် ကိုယ့်ဘုရင် ပါတော်မူတော့ အသည်းဆတ်ဆတ်ခါ နာကြပြန်တယ်။
စစ်မကြေငြာပါဘဲ ဝင်တိုက်တာ.. စစ်ပွဲဖြစ်ရခြင်းရဲ့ အကြောင်းရင်းကို အခုအချိန်အထိ အများပြည်သူ သိနားလည်အောင် ရှင်းမပြသေးတာတွေဟာ တစ်ခါက အောင်နိုင်သူတွေရဲ့ စိတ်ထားအတိုင်းပဲဆိုတာကို ပြန်မြင်နေရတာပါပဲ။
သူတို့ စံပြထားတဲ့ ထိုဘုရင်များဟာ ကိုယ့်တိုင်းပြည်ရွာ ဖွံ့ဖြိုးတိုးတက်အောင်ထက် အခြားတိုင်းပြည်တွေ စော်ဘွားပိုင်နယ်မြေတွေကို သိမ်းပိုက်ဖို့ အားသန်ခဲ့ကြသူတွေ ဖြစ်နေပါတယ်။
လူ့ဘဝကို အဓိပ္ပါယ်ရှိရှိနေသွားဖို့ တရားများများမလိုပါဘူး။ ကိုယ်မပေးနိုင်တာကို တခြားလူဆီက မတောင်းသင့်ဘူး လောက်နဲ့ပဲ အရင်စ ကြည့်ပါဦး။
ကချင်တွေဟာ ညောင်နှစ်ပင်ညီလာခံကို တက်ခဲ့သလို ၂၀၀၈ ဖွဲ့စည်းပုံအခြေခံဥပဒေကို လက်ခံခဲ့သူတွေပါ။ ကေအိုင်အေဟာ ကချင်ပြည်နယ်နဲ့ ကချင်ပြည်သူတွေကို အပြည့်အဝကိုယ်စားပြုသလား မေးခွန်းထုတ်မယ်ဆိုရင် အခု ကချင်ကို ဝင်တိုက်နေတဲ့ စစ်တပ်ကရော မြန်မာတစ်ပြည်လုံးနဲ့ နိုင်ငံသားအားလုံးကို ဘယ်လောက် ကိုယ်စားပြုသလဲဆိုတာကိုပါ ဖြေပေးပါ။
ကျွန်တော်တို့ လက်ထက်မှာ ဖြစ်ခဲ့တဲ့ စစ်ပွဲက တရားမျှတမှုမရှိ လူကြီးလူကောင်းမဆန်တဲ့ ကျူးကျော်စစ်ပွဲ တစ်ခုဖြစ်ခဲ့ပြီ ဆိုကြပါစို့။ ကျွန်တော်တို့ရဲ့ စစ်တပ်ကြီးက ကချင်ပြည်နယ်ကို စိစိညက်ညက်ကျေအောင် ချေမှုန်းသိမ်းပိုက်နိုင်ခဲ့ကြပြီ ဆိုကြပါစို့။

ဝဋ်ဆိုတာ လည်တတ်ပါလားလို့
သမိုင်းက အကြိမ်ကြိမ် ပြခဲ့ပါလျက် မိုက်မဲစွာ မှားယွင်းမှုကို တစ်ချိန်မှာ ကျွန်တော်တို့ရဲ့ သားသမီး မြေးမြစ်တွေက ပြန်ပေးဆပ်ရပါလိမ့်မယ်။
မျက်မှောက်ခတ်သမိုင်းဟာ အနာဂတ်မှာ တစ်ပတ်ပြန်လည်ပါလိမ့်မယ်။

ကျွန်တော်တို့ လူ့လောကထဲကို ရောက်လာတာ လူသတ်ဖို့၊ လူသတ်မှုတွေကို ထောက်ခံဖို့လည်း မဟုတ်သလို အသတ်ခံရဖို့လည်းမဟုတ်ဘူးဆိုတာကို လက်ခံရင် လူတွေကို အကြောင်းမဲ့သေစေတဲ့ စစ်ပွဲတွေကို ဆန့်ကျင်ကြရမှာပါပဲ။


လူစိုး

No comments:

Post a Comment