Search This Blog

Friday, March 8, 2013

ဥပဒေသ(၂) ငါးစိမ်းမမြင်ခင်ကတည်းက ငါးကင်ကိုအရင်ပြစ်ရမှာ

         ဘ၀မှာ ဒဏ်ရာတွေရခဲ့ဖူးကြမှာပေါ့။ ရှောင်လွှဲလို့မှ မရနိုင်ဘဲလေ။ ကျွန်တော်တို့ထဲက တစ်ချို့ဆို ကျန်တဲ့သူတွေထက် ပိုဆိုးဆိုးရွားရွား ခံခဲ့ရတာတွေရှိတယ်။ ဒါပဲလေ.. အမာရွတ်တွေက ကျွန်တော်တို့ကို ပုံဖော်သွားတာ၊ နောက်အချိန်ကြာသွားရင် ဒါတွေက ဘာမှ မဟုတ်တော့ပါဘူး။ ခုလောလောဆယ်တော့  ကျွန်တော်တို့ နောက်တစ်ခေါက် ဘ၀ထဲကို ပြန်မ၀င်ခင်မှာ အနာမြန်မြန်ကျက်ဖို့ လိုနေပါတယ်။ အချစ်ဆိုတာ အမြစ်ကနေတောင် အပွင့်ပွင့်ပြတတ်တဲ့ အပင်မျိုးပါ။ ဒါကို နားလည်မှာပါ။
         တကယ်လို့ ခင်ဗျားရဲ့ရှေ့က relationship တစ်ခု(ဒါမှမဟုတ် နှစ်ခု)မှာ ခင်ဗျား စိတ်ခံစားချက်တွေ သုံးစားမရအောင် ပျက်စီးသွားပြီဆိုရင်၊ နောက်ထပ် လက်တွဲဖော်တစ်ယောက်ကို မရှာခင် ခင်ဗျားလုပ်ရမှာ ထိခိုက်ဒဏ်ရာတွေကို အရင်ပျောက်အောင် ကုသဖို့ပဲ။ ဒီလိုမှမဟုတ်ရင် ခင်ဗျားရဲ့ စစ်မှန်တဲ့ကိုယ် ကို
ထုတ်ပြနိုင်မှာ မဟုတ်သလို၊ ခင်ဗျားခံစားချက်တွေနဲ့ ခင်ဗျား အချိန်တွေကုန်နေဦးမှာမို့ နောက်လူကိုလည်း ခင်ဗျား အာရုံစိုက်နိုင်ဦးမှာမဟုတ်ဘူးလေ။
         relationship အသစ်မှာ ခင်ဗျား အမှားလုပ်မိရင် (ဖြစ်လည်းဖြစ်တတ်တယ်)၊ အရင်ဟာတွေထက် ခင်ဗျား ပိုနာကျင်ရလိမ့်မယ်။ တကယ်လို့ တကယ်ဂရုစိုက်တတ်တဲ့၊ ချစ်တတ်တဲ့လူတစ်ယောက်နဲ့ ဆုံခွင့်ရခဲ့တာဆိုရင်တော့၊ ခင်ဗျားတို့နှစ်ယောက်ထဲက တစ်ယောက်ဟာ relationship အသစ်တစ်ခု စတင်ဖို့ အဆင်သင့်မဖြစ်သေးဘူးဆိုတဲ့အချက်က ခင်ဗျားတို့နှစ်ယောက်လုံးကို ထိခိုက်စေပါလိမ့်မယ်။
      ဆက်ဆံရေးတစ်ခုကနေ အဆင်မပြေဖြစ်ပြီး စိတ်တွေအသားကုန်ကျခဲ့တဲ့ သူငယ်ချင်းမတစ်ယောက် ရှိတယ်။ သူဟာ ကြင်နာတတ်တဲ့၊ ဂရုစိုက်တတ်တဲ့၊ ကာကွယ်ပေးတတ်တဲ့ ယောက်ျားတစ်ယောက်နဲ့ ထပ်တွေ့ပါတယ်။ သူလိုအပ်နေတယ်လို့ ထင်တဲ့ယောက်ျားမျိုးပေါ့။ နောက်နှစ်တွေမှာ သူ့ကို သန်မာတဲ့၊ လွတ်လပ်တဲ့မိန်းမတစ်ယောက်ဖြစ်လာတဲ့အထိ သူကစောင့်ရှောက်ပေးခဲ့ပါတယ်။ ပြီးတော့ ဘာဖြစ်သွားလဲ။ သူတို့နှစ်ယောက်ရဲ့ ဆက်ဆံရေးကို လုံးဝသတ်ပစ်လိုက်ပါတယ်။ သူငယ်ချင်းမဟာ ဟိုလူချစ်ခဲ့တဲ့ အမျိုးသမီးမဟုတ်တော့ဘူးလေ။ ယောက်ျားအများစုက စိတ်ဓာတ်ခိုင်မာတဲ့၊ လွတ်လပ်တဲ့ မိန်းမတစ်ယောက်ကို လိုချင်ကြပေမယ့် သူက အဲဒီအုပ်စုထဲမှာ မပါဘူး။ သူက ထိခိုက်ကြေကွဲလွယ်ပြီး ဂရုစိုက်ဖို့လိုအပ်နေတဲ့ မိန်းမမျိုးကိုပဲ သဘောကျတာလေ။
       ဒါဟာ အန္တရာယ်ပါပဲ။ ခင်ဗျားအနေနဲ့ ခင်ဗျားအတွက် ပြည့်စုံကောင်းမွန်တဲ့ ဘ၀လက်တွဲဖော်တစ်ဦး ရှာတွေ့ပြီဆိုရင်တောင်မှ၊ သူက ခင်ဗျားရဲ့ ခုလက်ရှိကို လက်ခံသူ၊ ခင်ဗျား ပြင်ဆင်ပြီး ဖြစ်လာမယ့်သူကို ရှာနေတာမဟုတ်ဘူးလေ။ ဒီလို ဆက်ဆံရေးမျိုးတွေဟာ ဘယ်တော့မှ အလုပ်မဖြစ်ဘူးလို့ မပြောဘူးနော်၊ ဒါပေမယ့် အရမ်း၊ အရမ်းကို ရှားပါတယ်။
      ဒါ့ကြောင့် ကိုယ့်မျက်နှာကိုယ် အရင်ကြည့်ပါ။ ဒဏ်ရာတွေမကျက်သေးရင်လည်း တစ်နေရာရာကို ထွက်သွားပြီး ပုန်းနေလိုက်ပါ။ သူငယ်ချင်းတွေနဲ့ မိသားစုတွေနဲ့ ပျော်အောင်နေပြီး အဆင်သင့်ဖြစ်တဲ့အထိ ခင်ဗျား နောက်တစ်ယောက်ရှာမတွေ့ခင် စောင့်လို့ရတာပဲလေ။ ရှာရင်လည်း အနာကျက်လုနီးနီး လူတစ်ယောက်ဆို ပိုကောင်းမှာပါ။ ဘာ့လို့ဆိုတော့ နှစ်ဦးနှစ်ဖက်အတွက် နစ်နာစရာလည်းမရှိ အဆင်ပြေနိုင်တယ်လေ။ ရှေ့မှာရေးခဲ့တဲ့ ဥပဒေသ(၁)နဲ့ တွဲလိုက်ပါ။ ခင်ဗျားတို့နှစ်ယောက် တစ်ယောက်ကိုတစ်ယောက် အရှိအရှိအတိုင်း မြင်နိုင်မယ်၊ ခင်ဗျားတို့ရဲ့ အချစ်ရေးကိုလည်း ခင်ဗျားတို့လိုချင်တဲ့ ပုံစံအတိုင်း ရှေ့ဆက်နိုင်မယ်လေ။

လူစိုး
        

No comments:

Post a Comment